Te Ururoa Flavell: Negative portrayal of Maori

Tena tatou katoa.

I nga rua wiki kua pahure i tu nga whakataetae kapa haka e rua mo nga waka o tenei rohe, a, kaore e kore ka eke panuku o tatou roopu i nga whakataetae a motu hei te tau e heke mai nei. Kei te hikaka te ngakau mo Te Matatini 2013 i konei i Rotorua, a, kei te piki haere te pumanawa o nga roopu katoa.

Ko tetahi o nga kauhau i puta mai i tetahi o nga kapa no Te Arawa, ko tera o te roopu o Kataore. Ara, he kauhau e pa ana ki te papaoho o nga karere Maori ki te ao, me te he rawa hoki o etahi ripoata. I whakatauiratia te kaikorero ra i nga ahuatanga pera ki te patuki tangata i te wharekai o Countdown, i te taone ano hoki, me te torutoru o nga papaho pai e pa ana ki te iwi Maori e rangona whanuitia ana.

Ia ra ka kite tatou i nga karere tukino i te Maori, me te hoha hoki te kite, hei aha ra te whakapaoho i nga ahuatanga pai pera i Te Ru o te Manawa me nga takaro o Te Arawa Pride. Kia hoki nga mahara ki nga whakataetae kapa haka o Te Arawa waka toru wiki kua pahure. Ka puta mai nga karere tukino i nga roopu me nga kaihaka me te whakaatu i te amuamu i waenga i a tatou o Te Arawa. Ko etahi o aua karere ko tera no etahi kaipapaho Maori! Ka noho pumau ko enei momo karere tukino i te mana o te Maori ko nga karere o te wa.

Ka hoki nga mahara ki nga ra o te tau 2004 ki te Tuhoe raids, me te kaha papaho kikino rawa e pa ana ki a ratou. Pera i nga whakaahua maha o Ruatoki, o te Urewera me te kaha whakapuaki he kaiwhakatumatuma te katoa o ratou. Ka mutu, kei te rere tonu aua whakaaro ki waenga i nga tangata o Aotearoa. Tena me mataki koutou i te pakipumeka Operation 8 kia kite ai i te tuakiri o aua karere.

No reira, me aha o tatou kaipapaho ki te whakatika i te whakapaoho o nga ahuatanga Maori? Ko te wahanga Maori o tenei niupepa tetahi huarahi, ara, kotahi ra ia wiki e whakapuaki ana i nga hui Maori me nga ahuatanga pai, engari, pehea nga karere o ia ra?

He wero pea ki nga kaipapaho o te motu ki te ata whakaaro ki o ratou e korerotia ana. Me ata whakaaro ki te mana o te whanau, te hapu, me te iwi whanui.