Te Ururoa Flavell: Meri kirihimete, hei te tau hou

Tena tatou katoa. Kati kua eke tatou ki te mutunga o te tau, ki te wa, ko te tikanga, ka noho whanau, ka whakanui i nga mea kua tutukina i a tatou katoa.

Moku ake, katahi te tau, ara ona piki me ona heke. Koina te ahua o tenei momo mahi, no reira he mea nui ki a au te hoki ki te kainga, me kii, kia purea e nga hau, hika, kia horoia i nga ngaawha.

Me whai wahi tatou ki nga mate huhua nei. Ko tera koroua o te Paati Maori ara a Mangu Clarke, tangata whai mai, tautoko mai i a au i te ropu mai i tona orokohanga. E pera ano hoki a Arthur Waititi o Te Whanau a Apanui, ki a Mary Whata hoki. E koro ma, ma korua a tatou mate e whakatau. Haere atu ra.

Kua eke au hei kaiarahi o Te Paati Maori, a, katahi nei te honore ko tera. He mahi nui tonu kei mua i te aroaro, ara a te tau hou engari ko au tenei ka whakapau i toku kaha katoa kia pumau te noho o te Paati Maori ki te ngakau o te iwi Maori, o te motu whanui, Pakeha mai, Pasifica mai, a wai ake , a wai ake. Ma te motu te kaupapa o te Paati Maori. Koia nei te take, kua toro atu matou i te ringa ki a David Tua!!

Naku tonu te Pire kore petipeti i kokiri i roto i te Whare Paremata. He mea tuatahi tera mo te Paati. Ko te nuinga o a matou Pire ka hinga na te kore tautoko o nga ropu nui engari ko tenei Pire, i eke. Koia nei tetahi painga o te noho hei hoa haere o te Kawanatanga. I ata noho au i te taha o te minita kei reira tohe ai, wananga ai i nga wahanga o te pire kia eke ki te wahi hei whakatau i nga awangawanga o nga taha e rua. Koia na tetahi mea tino nui ki a au.

Kati, kua tata ki te wa o te kirihimete me ona ahuatanga katoa, ara ko moeroa tera, ko puku nui tera, ko kaukau tera, ko whakataa tera. Ko te mea nui i tenei wahanga o te tau, kia whakanuia i a tatou ano, kia whai wa ki te tuku whakaaro, tuku aroha, ki o tatou whanau maha. Kia u ki nga uara o te kirihimete, te hari me te koa, kaore he wahi mo nga hara pera i te taraiwa haurangi, te whakaporearea, te whakararuraru me te whawhai. Kia piki te ora e hoa ma, a ka kite ano i te tau hou.