Te Ururoa Flavell: Let's make a hard stand

Ko tetahi ahuatanga kua kaha ngau mai i toku ngakau i te marama kua hipa ake nei, ki tenei hanga hou kua ara ake nei ki mua tonu i toku aroaro, ara, ko te whakamomori. Nonatatanei, i tae atu au ki Kawerau tonu ki tetahi whakangahau na te hunga taiohi o te taone i whakarite, i whakahaere i raro i te karangatanga o He Whanau Kotahi Tatou. He roopu tenei kua puta mai kia taea ai e nga whanau i noho mokemoke, awangawanga, pouri, riri nei i te mea kua ngaro atu tetahi o a ratou tamariki ki tenei mahi morikarika. I te kotahi tau, maha ake i te tekau tamariki kua kohuru nei i a ratou ano! No tera wiki te ngahau.
No tera wiki ano, i tu tetahi wananga i Rotorua nei ki te ata titiro ki tenei kaupapa. Ko etahi matanga mo taua take nga kaikorero, a, i wanangatatia ai ko te hohonutanga o tenei take. Na, i nga rua wiki kua hipa i tu tetahi hui a motu, a, ko tona kaupapa ... ko te whakamomori. Na tenei wiki tonu, tokorua nga tamariki kua whai i tenei huarahi. Tekau ma rua tetahi, tekau ma wha pea tetahi. Katahi nei te moumou o te tangata.
Ki taku e rongo nei, i nga wananga, he moumou taima te patai, na te aha e whai nei etahi i tenei huarahi, he aha te take ka penei mai te kaha kino o te ao, a, kotahi anake te huarahi ka mahue mai ki a tatou tamariki? Kei wareware tatou, he tamariki enei, a, e ai ki nga rangahau, ko te nuinga o nga tamariki nei no te whanau manaaki, aroha, tiaki nei i a ratou tamariki. Ko nga tamariki, he tamariki mohio, whai pumanawa, he tamariki whai hoa, e aroha nei ki o ratou matua. Me kii, kei a ratou te ao, engari, ko te ahua nei, kaore ratou i te kite i tetahi wahi i te ao nei mo ratou.
E hoa ma, koia nei te aroha. Kaore tetahi i te mohio he aha e penei ana te hanga o etahi. Na, kua eke ki te wa ki te kii ki waenganui i a tatou, ka rahi, kua mutu. Kati te mahi whakamomori. Ko te mate ke, kaore i a au te mana, kaore i a tatou tera mana. Kei te ngakau o te tangata tera.
Tera pea me maro a tatou tu. Ki te tarona mai tetahi i a ia ano, kaua e whakanui i a ia i te marae. Tera pea me tapuke i te urunga o te urupa, kia takatakahia e te iwi. Ma reira pea, ka kite atu, koia nei te hohonutanga o nga whakaaro o te iwi. Ae, he tirohanga maro nei, engari, he aha i tua atu? Aroha mai mo te whakaaro ake i tenei take i tenei wa, engari, kei te penei na taku matakitaki i nga whaea me nga papa, nga koroua me nga kuia i a ratou i noho i te hohonutanga o te pouri, o te mamae.
Ka nui taku aroha ki a tatou.
Link: English translation