Te Kura Reo o Tamaki nui-ā-Rua 2024

The 2nd Te Kura Reo o Tamaki nui-ā-Rua was held at Makirikiri marae near Dannevirke.

Nō te 10 ki te 12 o Hūrae i tū ai te tuaruatanga o Te Kura Reo o Tamaki nui-ā-Rua ki te marae o Mākirikiri, ki Aotea Sports Club, ki Te Kura Kaupapa Māori (TKKM) o Tamaki Nui A Rua. Nō ngā tōpito katoa o te motu i haere mai ai ngā kaipānga - he kanohi hou ētahi, he kanohi ētahi nō tauhouanga.

Inā te waimārie o raro i te pai o runga. I tāpiritia tētahi rangi anō ki te wātaka o te kura reo, ā, i paku āwangawanga nei ki te huarere. E ao ia, he rangi mokopuna i te roanga o te kura reo. Ka tau te puruma i te mutunga, ka tau te ua kōnehunehu. Ahakoa te makariri, i puta mai ngā tāngata ki te whai i ngā mahi. Heoi anō, inā te mahi a te wahine ki mua, ā, te mahi a te tāne ki muri.

Ko tētahi mea i kitekitea, ko te whiua reretia o te tini ki te moana uriuri o ngā mahi,

I taurite ngā rōpū ngā taumata, ngā akomanga, me ngā pouako ki te taiao manu. He ‘kāwai’ ngā rōpū. Ko te Reremāunu, ngā Rerepī, me ngā Reretau ngā taumata. Ko te ‘māunu’ he manu kāore anō kia puta i te kōhanga. Arā, ko te hungā tīmata tērā. Ko te ‘pī’ he manu kua tīmata tana puta i te kōhanga. Arā, ko te hunga waenga tērā. Ko te tau, koia te pai me te tōrire o te reo. He kōhanga ngā akomanga. Arā, ko te hunga matatau tērā. He whakakaimānga ngā pouako. Ko te ‘kaimānga’ te tukanga a te manu pakeke hei whāngai i ana māunu, i ana pī.

Inside the marae.

Tokowhā ngā Whakakaimānga:

· Tākuta Manahi Paewai: ko tāna kai, ko te reo tupuna – te hītori o Tahoraiti me Kaitoki. Hāereere ai āna akoranga ki aua wāhi torotoro ai, akoako ai. Koia te rorotu o ngā mahi i tērā tau.

· Te Moana-nui-ā-Kiwa Goddard-Karatea: ko tāna kai, ko te reo whakakōrero. He tākarokaro ngā mahi hei whakaputa i te reo kōrero.

· Wharemako Paewai: ko tāna kai, ko te reo wānanga kia ngahau – ko te whakaputa o te reo ngahau i te wānanga.

· Teriaki Tamasese: ko tētahi kai āna, ko te reo wā – he whakaako i te whakamahinga o ngā wāmahi e ai ki te wā. Ko tētahi kai āna, ko te reo whakapata – ko te ruku ki ngā waiata tupuna o te kāinga hei kite i te rerekētanga o te māramatanga o ngā tūpuna me te hunga ora.

Me mihi ka tika ki te tini patere i tautoko mai i te kura reo nei: Mākirikiri Marae, Aotea Sports Club, TKKM o Tamaki Nui A Rua, Magic Merch, TupuOra, Te Mātāwai, PCL Group, Hana Mae Pilkington, Iritana Edmonds, Tama Sean Petera me ngā ‘Lit Dads’. Kāore e ārikarika ngā mihi!

Kua tō te rā ki a Te Kura Reo o Tamaki nui-ā-Rua i tēnei tau, ā, hei te Āperira ara anō ai.

Nā Te Whare Taiao o Rangitāne.